Жедел медициналық жәрдем бригадасы үшін шұғыл көмек көрсету маңызды рөл атқарады. Жетісу облысы Ескелді ауданының тұрғындарына кезек күттірмейтін көмек көрсетуді жақсарту мақсатында республикада блок-модульдік конструкция технологиясы бойынша салынған алғашқы жедел медициналық көмек қосалқы станциясы ашылды.
Әлеуметтік маңызы бар нысан заманауи стандарттарға сәйкес келеді және қажетті жабдықтармен жабдықталған. Мұнда Ескелді ауданының 54 мыңға жуық тұрғынына қызмет көрсетіледі, қосалқы станция Қарабұлақ ауылында орналасқан, бұл ауыл тұрғындарына кезек күттірмейтін медициналық көмек көрсетудің қолжетімділігін арттырады
Қарабұлақ ауылындағы жедел медициналық жәрдем қосалқы станциясының жалпы ауданы шамамен 110 шаршы метрді құрайды. Нысанның құрылысына 2,5 ай жұмсалды. Мұнда 6 кабинет орналасқан, сондай-ақ аумақта жедел жәрдем көліктеріне арналған жабық тұрақ бар.
Жедел жәрдемнің «жүрегінде» бір аға фельдшер, аға жүргізуші және құрамында 4 фельдшер мен 4 жүргізуші бар төрт желілік бригада жұмыс істейтін болады.
