Жаңалықтар

2026 жылғы 1-2 шілде аралығында Стамбулда (Түркия) Дүниежүзілік денсаулық сақтау ұйымының (ДДСҰ) министрлік конференциясы өтті. Іс-шара жер сілкінісі кезінде халық денсаулығын қорғау және төтенше жағдайларда санитарлық-эпидемиологиялық қауіпсіздікті күшейту мәселелеріне арналды. Конференцияға Қазақстан Республикасының Денсаулық сақтау министрі Әлназарова Ақмарал Шәріпбайқызы мен Ұлттық шұғыл медицинаны үйлестіру орталығының Басқарма төрағасы Әділбеков Ержан Боранбайұлы қатысты. Жиынға денсаулық сақтау органдарының, халықаралық ұйымдардың және сала мамандарының өкілдері қатысып, жер сілкіністері кезіндегі төтенше жағдайларға денсаулық сақтау жүйесінің дайындығын арттыру мәселелерін талқылады. Ерекше назар санитарлық-эпидемиологиялық қауіпсіздікті күшейтуге, жедел әрекет ету тетіктерін дамытуға, медициналық эвакуацияны жетілдіруге және медициналық инфрақұрылымның тұрақтылығын арттыруға аударылды. Іс-шара барысында қатысушылар апат жағдайында медициналық көмекті ұйымдастыру бойынша халықаралық тәжірибе мен озық тәжірибемен алмасты. Сондай-ақ халықаралық ынтымақтастықты дамыту және төтенше жағдайларға дайындықты күшейту мәселелері қарастырылды.

2026 жылғы 1 шілдеден бастап Қазақстан Республикасының жаңа Конституциясы күшіне енді. Ол әрбір азаматтың денсаулығын қорғауға және медициналық көмек алуға құқығын бекітеді. Конституция туралы Ұлттық шұғыл медицинаны үйлестіру орталығының Акушерлік департаментінің басшысы Қажыбекова Гүлнар Болатқызы өз пікірін білдірді. Жаңа өмірдің дүниеге келуі — әрбір отбасы үшін ерекше әрі маңызды сәт, ол үлкен жауапкершілік пен ерекше қамқорлықты қажет етеді. Бұл кезеңде ана мен балаға қауіпсіз жағдай жасап, сапалы әрі уақтылы медициналық көмек көрсету өте маңызды. Жаңа Конституцияда көрсетілген мемлекеттік кепілдіктер ана мен баланың денсаулығын қорғаудың маңыздылығын айқындайды. Бұл отбасының берекесі мен болашақ ұрпақтың денсаулығының негізі.

2026 жылғы 2 шілдеде Ұлттық шұғыл медицинаны үйлестіру орталығында «Әділет» партиясының Астана қаласы бойынша «Бірлік» филиалының басшысы Ақтайлакова Гүлмира Нұрланқызы, Конституциялық кеңестің мүшесі Башимов Марат Советұлы және партия мүшелерінің қатысуымен кездесу өтті. Кездесудің басты тақырыбы – 2026 жылғы 1 шілдеден бастап күшіне енген Жаңа Конституция болды. Қатысушылар Жаңа Конституцияның ел болашағына бағытталған маңызды қадам екенін, оның азаматтардың құқықтарын қорғауды күшейтуге, қоғамның тұрақты дамуына және денсаулық сақтау жүйесін одан әрі жетілдіруге жаңа мүмкіндіктер ашатынын жеткізді. Сондай-ақ бұл өзгерістер халыққа көрсетілетін медициналық көмектің сапасы мен қолжетімділігін арттыруға ықпал ететіні атап өтілді.