Елімізде коронавирустық инфекцияға қарсы ерікті вакцинация 2021 жылдың 1 ақпанында басталды. Қазақстан Республикасы Денсаулық сақтау министрлігінің деректері бойынша 22 мың доза мөлшеріндегі «Спутник V» вакцинасының бірінші партиясы Ресейден әкелінді, ал 2021 жылғы 15 ақпанда Денсаулық сақтау министрлігінің Медициналық және фармацевтикалық бақылау комитеті Дәрілік заттарды сараптау ұлттық орталығының қорытындысы негізінде Қарағанды фармацевтикалық кешені жүргізген Гам-КОВИД-Вак (Спутник-V) вакцинасына тіркеу куәлігін берді.
Сондай-ақ, биылғы жылдың екінші тоқсанынан бастап вакциналау науқанына қазіргі уақытта клиникалық сынақтардың үшінші кезеңінен өтіп жатқан қазақстандық QazCovid-In препараты қосылады. QazCovid-in вакцинасын Қазақстан Республикасы Білім және ғылым министрлігі Ғылым комитетінің «Биологиялық қауіпсіздік проблемаларының ғылыми-зерттеу институты» РМК әзірледі.
Бүгін біз сіздерге Қазақстан Республикасы Денсаулық сақтау министрлігінің «Ұлттық шұғыл медицинаны үйлестіру орталығы» ШЖҚ РМК Басқарма Төрағасы Н.С. Ахильбеков мырзаның ресейлік «Спутник V» вакцинасын қабылдағаннан кейінгі хал-ахуалы туралы айтамыз.
Нұрлан Сәлімұлы, вакцина алғаннан кейін өзіңізді қалай сезінесіз? Қандай да бір жанама әсерлер болды ма?
- Біздің орталық шұғыл медициналық көмек көрсететіндіктен, медициналық авиацияның мобильдік бригадалары күн сайын пациенттермен тікелей байланыста болады, медициналық қызметкерлер арасында жұқтыруды болдырмау мақсатында біз COVID-19-ға қарсы вакцинацияға алғашқылардың бірі болып қосылдық. Маған келетін болсақ, вакцинациядан бұрын қажетті тексеруден өттім: температурамды өлшеді, сатурацияны тексерді, содан кейін вакцинаны алуға келісім парағын толтырдым, инъекциядан кейін вакцинация реакциясын бақылау үшін медициналық мекемеде 30 минут болдым. Екінші компоненттік вакцина 21 күннен кейін жасалады. Екі аптадан астам уақыт өтті, менің жай-күйім жақсы, шағымдар жоқ.
Сіз вакцинаға сенесіз бе?
- «Спутник V» - Н. Ф. Гамалеи атындағы ресей Ұлттық эпидемиология және микробиология зерттеу орталығы әзірлеген және 2020 жылғы 11 тамызда РФ Денсаулық сақтау министрлігі әлемде бірінші болып тіркеген COVID-19 коронавирустық инфекциясына қарсы біріктірілген векторлық вакцина. «Спутник V» - тиімділігі 90% асатын әлемдегі үш вакцинаның бірі. Бұл вакцинаны жасауда векторлық технология қолданылды: бұл вакцина жасалынған вирустың гені адамның бейтараптандырылған аденовирусына енгізілген кезде, вакцина ауруды тудырмай иммундық реакцияны белсендіре алады. Технология жетік меңгерілген және практикада бірнеше рет тексеруден өтті. Осы әдіс арқылы қызылша, желшешек, свинка және қызамыққа қарсы вакциналар жасалған. Векторлық вакциналарды қолдану тәжірибесі (енгізудің екі еселік сызбасы кезінде) иммунитет 2 жылға дейін сақталатынын көрсетеді.
Сіз халыққа вакцинация жасатуға кеңес бересіз бе?
- Пандемия басылмағанын ескере отырып, адамдардың ауруы жалғасуда, вакцинация вирусты басу және оның көп мөлшерде көбеюіне жол бермеу үшін қажет. Вирустың «өмірі» біздің сау жасушаларымызға зиян келтіруден және оларды вирустық ошақ шығаруға мәжбүр етуден тұрады. Өлтірілген вирус көбеюге қабілетті емес. Вирустың өзі қазір бізбен барлық жерде, сондықтан мен вакцинопрофилактика коронавируспен күресудің тиімді әдістерінің бірі деп санаймын. Біз, медицина қызметкерлері – вирусты жұқтыруға бейім топпыз, өйткені алдыңғы қатарда құтқаруда жүреміз. «Ақ халатты абзал жандар» барлық күш-жігерін, білімі мен еңбегін орналасқан жеріне қарамастан оған мұқтаж Қазақстан Республикасының тұрғындарына медициналық көмек көрсетуге жұмсайды. COVID-19 -ға қарсы вакцинациялау ерікті түрде, оның ішінде денсаулық сақтау қызметкерлері үшін тегін болып табылады және тегін медициналық көмектің кепілдік берілген көлемі шеңберінде жүргізілетінін естеріңізге сала кетейін.
Толық жауап бергеніңіз үшін алғыс айтамыз.
