Бүгін ҚР Денсаулық сақтау министрі Ақмарал Әлназарова ҰШМҮО жанынан ашылған Жүрек ритмі орталығының жұмысымен танысты.
Сапар барысында орталықтың жетекшісі Аян Әбдірахманов мекеменің қызмет бағыттары мен заманауи медициналық құрал-жабдықтармен қамтылуы туралы жан-жақты ақпарат берді. Сонымен қатар, министр Жүрек ритмі ғылыми-зерттеу институты кафедрасының студенттерімен бейресми кездесу өткізді.
Жүрек ритмі орталығының ашылуы — Қазақстандағы аритмология қызметін дамыту жолындағы маңызды қадам болды. Орталықтың негізгі мақсаты — халықты жүрек ырғағының бұзылыстарын анықтау мен емдеудің заманауи әдістерімен қамтамасыз ету, жоғары білікті мамандар даярлау және телемедициналық инфрақұрылымды дамыту. Мұнда аритмия кезінде 3D-картография, радиожиілікті абляция, сымсыз кардиостимуляторларды имплантациялау және басқа да жоғары технологиялық араласулар жүргізіледі.
Орталық ашылғалы бері 14 ота сәтті орындалып, барлық пациенттерге қажетті арнайы медициналық көмек көрсетілді.
