2025 жылғы 6 мамырда ҰШМҮО Қытай Халық Республикасының Гуанджоу Медициналық Университеті делегациясын ресми сапармен қабылдады. Делегация құрамына университет Президенті Синцунь Чжао, вице-президент Цзяньхуа Ли және халықаралық байланыстар бөлімінің жетекшісі кірді.

Сапар аясында қонақтар ҰШМҮО ауруханасының қызметімен танысып, қабылдау бөлімін аралады, сондай-ақ операциялық блокты қоса алғанда, заманауи медициналық жабдықтарды көріп шықты. Делегация мекеменің ұйымдастырушылық деңгейін, медицина қызметкерлерінің кәсібилігін және техникалық жабдықталуын жоғары бағалады.

Кездесу барысында тараптар медицина мен ғылым салаларында тәжірибе алмасу мүмкіндіктерін талқылап, екіжақты ынтымақтастықты дамытуға өзара қызығушылық білдірді. Әсіресе жақын болашақта өзара іс-қимыл туралы меморандумға қол қою мәселесіне ерекше назар аударылды.

Аталған сапар шұғыл медицина саласындағы халықаралық әріптестікті нығайту мен бірлескен жобаларды дамыту жолындағы маңызды қадам болды.