Оқу-тренингтік орталық (ОТО) – шұғыл медициналық көмек көрсетудің халықаралық стандарттары бойынша медицина қызметкерлерін оқытуға және олардың біліктілігін арттыруға, медициналық манипуляциялар техникасын пысықтауға, сондай-ақ шұғыл жағдайларда дұрыс әрекет етуге үйретуге арналған озық оқыту әдістерін қолданатын жоғары технологиялық симуляциялық орталық.
ОТО-ның негізгі мақсаты – халықаралық стандарттарға сәйкес шұғыл медициналық көмек көрсету дағдыларын оқыту және жетілдіру.
ОТО медициналық авиация, жедел медициналық жәрдем және шұғыл медициналық көмек қызметтерінің қызметкерлеріне, оған қоса, шұғыл медицина саласындағы халықаралық стандарттар бойынша оқудан өтетін мамандарға бағытталған. Сонымен қатар, орталықта медициналық білімі жоқ азаматтар да оқудан өте алады.
Оқу процесін ұйымдастыру үшін ОТО-да заманауи симуляциялық және тренажерлық жабдықтармен жабдықталған дәрісханалар мен оқу сыныптары қарастырылған.
2023 жылғы қазанда Ұлттық шұғыл медицинаны үйлестіру орталығында Сыртқы сараптау комиссиясы мүшелерінің қатысуымен институционалдық аккредиттеу рәсімі өткізілді. Аккредиттеу барысында ҰШМҮО мамандардың үздіксіз кәсіби дамуының сапасын қамтамасыз ету саласындағы жетістіктерін таныстырды.
«Еуразиялық аккредиттеу және білім беру мен денсаулық сақтау сапасын қамтамасыз ету орталығы» КЕҰ Аккредиттеу кеңесінің 2023 жылғы 28 қарашадағы №7 хаттамасына сәйкес қабылданған шешімімен ҰШМҮО 2023 жылғы 28 қарашадан бастап 2028 жылғы 27 қарашаға дейінгі мерзімге (5 жыл) аккредиттелді.
